Breytt áætlun - Fyrirlestur um tölvur og skák í kvöld

Vegna sérstakra aðstæðna hefur verið ákveðið að skipta á fyrirlestri sunnudagsins og hraðskák fimmtudagsins. TM-mótaröðin verður því á sunnudaginn.

Í kvöld kl. 20.00 verður fyrirlestur hins unga Símonar Þórhallssonar. Mun hann fjalla um tölvur og skák. Sjónunum verður einkum beint að ChessBase 13 og Megadatabase. Símon mun fara yfir möguleika forritsins og skyldra forrita og segja frá hvernig hægt er að nota slík forrit til undirbúnings einstakra skáka sem og almennrar skákþjálfunar.

Aðgangur er öllum heimill og ókeypis. Þeir sem eiga fartölvur og skákforrit geta komið með tölvur sínar og æft sig en ekki er skylda að mæta með fartölvur til að njóta leiðsagnarinnar.

 

TM-mótaröðin og fyrirlestur

Fimmtudaginn 26. mars verður tefld hraðskák í skákheimilinu en þá fer fram umferð í TM-mótaröðinni. Staðan er eins og hér má sjá:

	8.jan	15.jan	22.jan	12. feb.	5.mar	samtals
Símon Þórhallsson	8,5	8	9,5	9	11	46
Jón Kristinn	10,5	10	10		13	43,5
Andri Freyr Björgvinsson	6,5	3		6,5	11	27
Haraldur Haraldsson	5,5	3,5	5,5	5	6	25,5
Smári Ólafsson		8		8,5	9	25,5
Sigurður Arnarson			9	10,5		19,5
Karl Egill Steingrímsson	0,5	5	2	3	5	15,5
Ólafur Kristjánsson					15	15
Haki Jóhannesson			6		6,5	12,5
Þór Valtýsson					10,5	10,5
Gylfi Þórhallsson				8,5		8,5
Sveinbjörn Sigurðsson	3,5				4	7,5
Sigurður Eiríksson	7					7
Kristinn P.		4				4
Hreinn Hrafnsson				2		2
Kristján Hallberg			0			0

 

 

Á sunnudaginn verður stórviðburður á okkar vegum. Þá flytur Símon Þórhallsson fyrirlestur um tölvur í skák. Einkum verður sjónum beint að ChessBase13. Þeir sem eiga fartölvur og forrit geta tekið þær með sér og æft sig eftir fyrirlesturinn.

Að  lokum skal minst á Sprettsmótið á laugardag sem lesa má um hér neðar á síðunni.

 

Íslandsmót skákfélaga - pistill formanns.

Nú er lokið Íslandsmóti skákfélaga í 41. sinn, en mótið gekk lengi vel undir heitinu Deildakeppni SÍ og er mörgum það heiti enn tamt á tungu. Þátttaka í þessari keppni hefur ávallt verið einn af hápunktum ársins hjá okkur skákfélagsmönnum, enda fer þar saman spennandi og skemmtileg skákiðkun, tilbreyting og fögnuður gamalla og nýrra skákvina sem þar koma saman af öllu landinu. Skákfélagið hefur undanfarin ár oftast sent fjórar sveitir til keppni og var svo einnig nú. Á fyrra ári unnu b, c, og d-sveitir félagsins sig allar upp um deild, en a-sveitin barðist fyrir lífi sínu í 1. deild, þar sem aðrar sveitir hömpuðu einum eða fleiri stórmeisturum í síðu liði. Það virtist því liggja fyrir nú að verkefni okkar yrði að halda sjó í fyrstu, annarri og þriðju deild og tryggja þau sæti sem unnust síðast. Það gekk að mestu eftir og heildarárangur okkar með besta móti.

Í fyrstu deild var nú sú ákvörðun tekin að tefla einungis fram heimamönnum, styrkja ekki liðið með útlendum meisturum eins og öll undanfarin ár. Vissulega höfum við þar verið dálítið sér á báti í deildinni – treyst á félaga og vini úr Bronshøj Skakklub með AM Thorbjørn Bromann í broddi fylkingar, en látið eiga sig að kaupa að nafntogaða og stigaháa stórmeistara. Nú átti Bromann ekki heimangengt og við ákváðum að láta slag standa og spara okkur kostnainnð sem felst í því að fá liðsmenn frá útlöndum. Það þýddi auðvitað að napurt myndi næða um efstu borðin þar sem við vorum stigalægri en andstæðingarnir. Þeim Halldóri Brynjari og Rúnari var falið þetta verkefni og stóðu sig með prýði, þótt ágjöfin á skektu þess fyrrnefnda, sem telfdi 9 skákir á fyrsta borði hafi stundum verið í mesta lagi. Aðrir fengu fyrir bragðið viðráðanlegri andstæðinga. Er skemmst frá því að segja að liðsmenn bitu hressilega frá sér og náðu flestir betri árangri en vænta mátti af stigum þeirra í upphafi móts. Falldraugurin var víðsfjarri og endaði sveitin í sjötta sæti af tíu með 33,5 vinninga – langt frá botnbaráttunni. Af níu viðureignum unnust fjórar nokkuð örugglega. Flesta vinninga fengu yngstu liðsmennirnir, Jón Kristinn og Mikael, eða 6, en bestum árangri miðað við stig andstæðinga náðu þeir Rúnar og Áskell á 2. og 3. borði og tókst báðum m.a. að leggja stórmeistara að velli. Nánar má skoða árangur einstakra liðsmanna hér.

Skákfélagið Huginn varð Íslandsmeistari eftir harða keppni við Taflfélag Reykjavíkur og Taflfélag Vestmannaeyja.

B-sveitin tefldi nú í 2. deild og var eins og undanfarin ár að mestu skipuð marghertum baráttujöxlum á sjötugsaldri. Hér reyndist það verkefni að halda sér í deildinni harla létt og reyndar leit um tíma út fyrir að sveitin gæti farið alla leið í fyrstu deild! Sveitin hreppti bronsverðlaunin í deildinni og fékk 22.5 vinninga. Flesta fékk liðsstjórinn, Sigurður Arnarson, eða 5,5, en þeir Jón Þ. Þór, (sem aðeins tefldi í seinni hlutanum) og Haraldur Haraldsson náðu bestum árangri miðað við stig andstæðinga. Nánar má skoða árangur einstakra liðsmanna hér.

B-sveit Taflfélags Reykjavíkur vann deildina og teflir í fyrstu deild að ári ásamt Skákdeild KR.  Myndin sem birtist hér var einmitt tekin úr viðureign okkar við KR-inga. Myndasmiður er Einar S. Einarsson liðstjóri þeirra og sjást hér í forgrunni nafnarnir Sigurður Arnarson (fjær, t.v.) og Eiríksson að tefla við Gunnar Kr. Gunnarsson (fjær) og Ólaf Gísla Jónsson.

C- og D-sveitir tefldu í þriðju deild og varð snemma ljóst að þeirra myndi bíða nokkuð ólíkt hlutskipti. C-sveitin fór með himinskautum og var hársbreidd frá því að vinna sér sæti í annarri deild. Sveitin vann fjórar viðureignir og tapaði þremur og fékk 24,5 vinning. Enn var það liðsstjórinn sem fór fyrir sínum mönnum með góðu fordæmi og vann Smári Ólafsson sex skákir af sjö (tefldi reyndar eina með b-sveitinni). Símon Þórhallsson, sem tefldi með b-sveit í fyrrihlutanum hlaut alls 5,5 vinning. Andri Freyr Björgvinsson tefldi allar umferðirnar sjö með C-sveitinni og fékk 5 vinninga. D-sveitin glímdi við falldrauginn allt mótið en átti þó um tíma góða möguleika á því að halda sér í deildinni. Ólukkulegt tap í næstsíðustu umferð reyndist hér afdrifaríkt og þrátt fyrir hetjulega baráttu í lokaumferðinni mátti sveitin sætta sig við að vera í efsta sæti fallsveitanna og mun því tefla í fjóðru deild að ári. Í þessari sveit tefldu bæði ungir og aldnir náði Haki Jóhannesson bestum árangri liðsmanna að þessu sinni. Úrslitin í 3. deild má sjá hér. 

C-sveit Taflfélags Reykjavíkur vann deildina og teflir í annarri deild að ári ásamt sveit Ungmennasambands Borgfirðinga.

Þegar á heildina er litið er árangur félagsins í keppninni vel viðunandi. Þótt eldri félagsmenn séu enn iðnir við kolann og hafi flestir staðið sig með prýði, þá voru það ungu mennirnir Mikael, Jón Kristinn, Símon og Andri sem bættu sig mest. Jón tefldi nú í fyrsta sinn í A-sveit en örugglega ekki það síðasta. Mikael er þegar orðinn reyndur á þeim vettvangi og líklegt að Símon og Andri muni vinna sér sæti í þeirri sveit bráðlega.

Þegar árangurinn er mældur í stigum kemur í ljós að hann er æði mismunandi. En sem hópur snerum við heim með fleiri stig en áður – líklega var heildargróði félagsins að þessu leyti nálægt 130 stigum. Bætist það við þau 85 stig sem Skákfélagsmenn náðu í hús á nýlega aflokun Reykjavíkurskákmóti. Hún þyngist því stigapyngjan hér norðan heiða.

Við hlökkum öll til næsta Íslandsmóts skákfélaga og stefnum að því að gera enn betur þá!