Jón Kristinn Þorgeirsson skákmeistari Akureyrar

Eins og kunnugt er urðu þrír meistarar eftir og jafnir á Skákþingi Akureyrar 2016. Þeir þurftu því að tefla til úrslita um titilinn.  Fyrst áttust við þeir Sigurður Eiríksson og Haraldur Haraldsson og vann sá fyrrnefndi þá skák eftir að hafa snúið á andstæðing sinn í miðtaflinu og náð óstöðvandi sókn. Næst tefldi Sigurður við Jón Kristin Þorgeirsson, meistarann frá 2014. Með sigri í þeirri skák gat Sigurður tryggt sér meistaratitilinn í fyrsta sinn og um tíma var staða hans vænleg. Að lokum náði Jón þó að snúa Sigurð niður og stóð því með pálmann í höndunum fyrir skák sína við Harald, sem tefld var í gærkveldi. Haraldur - sem varð að vinna skákina til að vera með í baráttunni - tefdli hvasst og sótti að kóngi Jóns, sem var berskjaldaður á upphafsreit sínum. En með snjallri vörn tókst Jóni að skipta upp í jafnteflislegt endatafl og varðist frekari vinningstilraunum Haraldar fimlega. Jóni hefði nægt jafntefli í skákinni, en smám saman náði hann undirtökunum og sigraði. Hann er því skákmeistari Akureyrar 2016 og óskum vð honum til hamingju með titilinn. Sigurður Eiríksson hafnaði í öðru sæti og Haraldur Haraldsson í því þriðja.

Rúnar Sigurpálsson hraðskákmeistari Akureyrar

Níu keppendur mættu til leiks á hraðskákmóti Akureyrar sunnudaginn 21. febrúar, þrátt fyrir ófærð og snjóblindu. Tefld var tvöföld umferð (16 skákir) og skipuðu þrír keppendur sér í forystusveit framan af móti, meistarinn frá því í fyrra, Rúnar Sigurpálsson, hinn einfætti Áskell Örn Kárason og skákmeistari Akureyrar frá 1964, Ólafur Kristjánsson. Ólafur slakaði á klónni í seinni hluta mótsins, þannig að þegar þeir Rúnar og Áskell mættust í næstsíðustu umferð var um hreina úrslitaskák að ræða. Með sigri í þeirri skák tryggði Rúnar sér hraðskákmeistaratitilinn í 77. sinn og gat slakað á í síðustu skák sinni við fræðafákinn Sveinbjörn Sigurðsson, sem hann reyndar vann einnig. Því lítur lokastaðan svona út:

1. Rúnar Sigurpálsson     14,5

2. Áskell Örn Kárason     13

3. Ólafur Kristjánsson    10,5

4. Sigurður Eiríksson      8

5-6. Andri Freyr Björgvinsson og

Haraldur Haraldsson        7

7. Smári Ólafsson          6

8-9. Haki Jóhannesson og

Sveinbjörn Sigurðsson      3

  

Hver verður skákmeistari Akureyrar 2016?

Þar sem þrír keppendur urðu jafnir í efsta sæti á nýliðnu Skákþingi Akureyrar þarf að heyja aukakeppni um titilinn. Nú hefur verið dregið um töfluröð í keppninni og verður telft til úrslita sem hér segir:

Miðvikudaginn 24. febrúar kl. 17.00  Sigurður Eiríksson-Haraldur Haraldsson

Fimmtudaginn 25. febrúar kl. 17.00   Jón Kristinn Þorgeirsson-Sigurður Eiríksson

Föstudaginn 26. febrúar kl. 17.00    Haraldur Haraldsson-Jón Kristinn Þorgeirsson

Hér er um kappskákir að ræða, 90 mínútur á keppanda og skák með 30 sekúnda viðbót fyrir hvern leik. Ef tveir eða þrír keppendur verða enn jafnir eftir þetta varða tefldar atskákir, einföld umferð. Ef enn verður jafnt verða tefldar hraðskákir, sömuleiðis einföld umferð. Loks verður baráttan útkljáð með bráðabanaskák, ef með þarf.