TM - mótaröðin heldur áfram

Á morgun, fimmtudaginn 16. mars fer 5. umferð TM-mótaraðarinnar fram. Taflið hefst kl. 20.00 og tefldar verða hraðskákir.

Jón Kristinn hraðskákmeistari

Tíu skákkempur mættu til leiks í dag, 12. mars til að skera úr um það hver myndi hampa titlinum "Hraðskákmeistari Akureyrar" næsta árið. Hart var barist og spenna mikil og var mönnum nú skammtaðar fjórar mínútur á skákina og tvær sekúndur að auki fyrir hvern leik (4-2). Þá var mótið og reiknað til alþjóðlegra hraðskákstiga, sem jók vitanlega mjög á taugatitring í hópi keppenda. Eins og veljulega tók Jón Kristinn Þorgeirsson forystuna, en nokkrir félagar hans voru þó skammt undan. Kvað svo rammt að þessu að ef Jón hefði tapað skák sinni við Áskel Örn Kárason í síðustu umferð hefði sigurinn fallið þeim síðarnefnda í skaut. Leit lengi út fyrir að svo færi, en að lokum mátti snerpa unga mannsins sín meira og hann hafði sigur, eins og undantakningarlaust á öðrum mótum vetrarins. Jón fékk sumsé átta vinninga, Andri Freyr Björgvinsson sjö, en þeir Áskell og Sigurður Arnarson sex og hálfan. Töfluna má sjá á Chess-results. 

Tómas vann 10 mínútna mót

Fimmtudagskvöldið 9. mars voru telfar 10 mínútna skákir. Heldur var fámennt þetta kvöld, en góðmennt engu að síður. Fimm menn telfdu tvöfalda umferð (átta skákir) og röðuðust svo að loknu móti:

Tómas Veigar Sigurðarson       7

Smári Ólafsson                 5

Sveinbjörn Sigurðsson          3,5

Karl Sreingrímsson             2,5

Heiðar Ólafsson                2