Mótaröðin:

Jón Kristinn efstur

Annað mót mótaraðarinnar var teflt í gærkvöldi. Sjö skákmenn mættu til leiks og tefldu tvöfalda umferð. Úrslit urður þessi

1.    Jón Kristinn Þorgeirsson    10 v. af 12

2.    Haki Jóhannesson              8,5

3-4. Sigurður Arnarson              8

3-4. Sveinbjörn Sigurðsson       8

5.    Atli Benediktsson               5

6.    Haukur Jónsson                 1,5

7.    Bragi Pálmason                  1

Jón Kristinn hefur því tekið forystu í mótaröðinni eftir tvö mót með 17,5 vinning. Sigurður Arnarson er í öðru sæti með 15 og þeir Sveinbjörn og Haki hnífjafnir í því þriðja með 13 vinninga.

Næst verður teflt í mótaröðinni 13. október. Við minnum svo á haustmótið sem hefst nú á sunnudaginn kl. 13.

 

Haustmótið að hefjast:

Haustmót Skákfélagsins byrjar nú á sunnudaginn og hefst kl. 13. Þá er teflt um meistaratitil félagsins, en mótið er einnig opið utanfélagsmönnum. Telfdar verða að lágmarki 7 umferðir, en fjöldi umferða ræðst af þátttakendafjölda.  Teflt verður á sunnudögum kl. 13 og miðvikudögum kl. 19.30. Þáttökugjald er kr. 2.500 fyrir félagsmenn en kr. 3.000 fyrir utanfélagsmenn. Unglingar sem greiða æfingagjald greiða ekkert fyrir þátttökuna í þessu móti, frekar en öðrum. Umhugsunartími verður 90 mín. á skákina, auk þess sem 30 sek. bætast við tímann fyrir hvern leik.

Hægt er að skrá sig á mótið með því að senda tölvupóst á [e-mail], en einnig er hægt að skrá sig á skákstað við upphaf fyrstu umferðar.

Stjórn félagsins endurkjörin á aðalfundi

Aðalfundur félagsins var haldinn sl. sunnudag. Fram kom að rekstur félagsins hafði gengið vel á nýliðnu starfsári og varð nokkur afgangur af starfseminni í fyrsta sinn um nokkra hríð.  Á skáksviðinu hafa skipst á skin og skúrir, en árangur félagsmanna í unglingaflokki hefur verið frábær þar sem þeir   Jón Kristinn og Mikael Jóhann urður báðir tvöfaldir Íslandsmeistarar, hvor í sínum aldursflokki, auk þess sem Jón Kristinn vannsigur í skákkeppni Unglingalandsmótsins á Egilsstöðum. Formaður lýsti hinsvegar áhyggjum sínum af minnkandi þátttöku á skákmótum og því að nokkri virkir skákmenn hafa flust úr bænum. Nokkrir skákmenn hafa sagt sig úr félaginu, en á fundinum voru 5 nýjir félagar teknir inn, þar af 4 útlendir meistarar. 

Í ávarpi sínu í lok fundarins sagði formaður það verða verkefni stjórnar að halda áfram hinu hefðbundna félagsstarfi og mótahaldi, en leita einnig leiða til að efla enn barna- og unglingastarf og að laða nýja krafta að félaginu. Mikið væri af skákáhugamönnum sem væru lítt virkir og kæmu sjaldan á skákfundi. Því þyrfti að breyta.