Skin og skúrir á Íslandsmóti skákfélaga

Seinnihluti Íslandsmóts skákfélaga var háður á Selfossi um sl. helgi.  Fjórar sveitir frá Skákfélaginu taka þátt í mótinu og var árangur í þetta sinn eftir vonum.  A-sveitin átti í harðri fallbaráttu í 1. deild og tókst með harðfylgi að halda sér uppi. Sveitin lenti raunar í 5. sæti af 8, en var þó aðeins hálfum vinningi ofar en Mátar, sem féllu í 2. deild eftir fyrsta ár sitt í þeirri efstu. Eins og kunnugt er er sveit Máta skipuð gömlum félögum úr SA. A-sveit Bolungarvíkur vann mótið nú í fjórða sinn á jafnmörgum árum.  Ljóst er þó að barátta okkar við að halda sæti í 1. deild verður áfram erfið með sama mannskap. B-sveitin hélt sig í efri hluta 3. deildar og hafnaði loks í 4. sæti, sem verður að teljast viðunandi. C-sveitin, (að mestu skipuð 60 ára og eldri) var í vonlítilli stöðu eftir fyrrihlutann og varð að sætta sig við fall í 4. deild. Þar er fyrir unglingasveit félagsins sem var rétt fyrir neðan miðja deild og náði viðunandi árangri.

Þátttaka í Íslandsmóti skákfélaga er viðamesta verkefni Skákfélagsins á hverju ári, bæði hvað þátttöku varðar (rúmlega 30 keppendur), og kostnað. Mótið er vinsælt meðal félagsmanna og verður það væntanlega áfram. Næsta keppnistímabil hefst í október í haust.

TM-syrpan heldur áfram

Fimmta mótið í hinni sívinsælu TM-mótaröð verður háð á morgun, fimmtudag. Að syrpunni hálfnaðri eru eftir og jafnir þeir Tómas Veigar Sigurðarson og Jón Kristinn Þorgeirsson með 35 stig. Næstur kemur svo Sigurður Eiríksson með 31.

Um helgina er ferðinni svo heitið á Íslandsmót skákfélaga á Selfossi þar sem félagið mætir til leiks með 4 sveitir; a-sveit í 1. deild, b- og c-sveit í 3. deild og unglingasveit í 4. deild.  A og c-sveitirnar eru í fallbaráttu en b-sveitin á veika von um að blanda sér í baráttu um sæti í 2. deild.

Lagt verður af stað á föstudag kl. 11 frá Skákheimilinu.

Tómas vann í TM-mótaröðinni

Fjórða mótið í TM-mótaröðinni var teflt í gærkvöldi. Hart var barist að venju og úrslit sem hér segir:

 

1	Tómas V Sigurðarson	10
2-3	Sigurður Eiríksson	9
	Smári Ólafsson	9
4	Jón Kristinn Þorgeirsson	8
5	Sveinbjörn Sigurðsson	5½
6-8	Andri Freyr Björgvinsson	5
	Atli Benediktsson	5
	Haki Jóhannesson	5
9	Ari Friðfinnsson	4
10	Karl E Steingrímsson	3
11	Hreinn Hrafnsson	2
12	Bragi Pálmason	½

Með sigrinum komst Tómas upp að hlið Jóns Kristins og eru þeir tveir nú langefstir í heildarkeppninni þegar fjórum mótum er lokið af átta. Þeir hafa báðir nælt sér í 35 stig en næsti maður er ekki langt undan;  Sigurður Eiríksson með 31 stig. Haki Jóhannesson er fjórði 21 stig og spurning hvort Sigurður er að stinga hann af í baráttunni um bronsverðlaunin í röðinni. Er barátta þeirra um þau verðlaun í mótaröðinni sl. haust enn í minnum höfð. Næstur kemur Sigurður Arnarson lúpínuvinur og hefur 18,5 stig, en Smári Ólafsson kemur á hæla honum með 18. Aðrir hafa minna en gætu bætt sig í næstu mótum, einkum Sveinbjörn Sigurðsson, sem nú tók þátt í sínu fyrsta móti í langan tíma og sýndi að hann hefur engu gleymt.

15 mínútna mót er fyrirhugað nk. sunnudag og hefst kl. 13.