Skákþing Akureyrar í barna- og unglingaflokkum

fer fram laugardaginn 31. mars nk. og hefst kl. 13.00.

Teflt verður um titilinn Skákmeistari Akureyrar í eftirfarandi flokkum:

1. Barnaflokkur,  fædd 2001 og síðar.
2. Pilta- og stúlknaflokkur, fædd 1999 og 2000.
3. Drengja- og telpnaflokkur, fædd 1996-1998.

Verðlaunapeningar verða veittir fyrir sigur í hverjum flokki, svo og fyrir þrjú efstu sætin í keppninni samanlagðri. Þá verða dregin út páskaegg í verðlaun.

Umhugsunartími er 10 mínútur á skákina og verða tefldar 7 umferðir eftir Monrad-kerfi.

Mótið tekur um 2½ tíma.

Keppendur geta skráð sig með tölvupósti á netfangið [e-mail], eða á skákstað 10 mínútum fyrir upphaf móts. Öllum börnum á grunnskólaaldri heimil þátttaka.

Teflt verður í skákheimilinu í Íþróttahöllinni, (gengið inn að vestan).

TM-mótaröðin:

Tómas Veigar heldur forystunni

Sjöunda og næstsíðasta mótið í röðinni fór fram sl. fimmtudagskvöld. Úrslit urðu sem hér segir:

 

1-3	Jón Kristinn Þorgeirsson	8
1-3	Sigurður Arnarson	8
1-3	Tómas V Sigurðarson	8
4	Hreinn Hrafnsson	7½
5-6	Karl E Steingrímsson	5½
5-6	Haki Jóhannesson	5½
7	Smári Ólafsson	4½
8	Sigurður Eiríksson	4
9	Andri Freyr Björgvinsson	2
10-11	Bragi Pálmason	1
10-11	Ari Friðfinnsson	1

Forystusauðirnir í syrpunni halda því áfram að raka inn vinningum en staða þeirra innbyrðis breytist ekki mikið.  Tómasi með þessum árangri að halda forystu sinni óbreyttri og verður að teljast líklegur til að bera sigur úr býtum í mótaröðinni. Sá eini sem getur ógnað honum er Jón Kristinn og mun ef að líkum lætur leggja allt í sölurnar á lokamótinu nú á fimmtudaginn. Baráttan um bronsið stendur milli nafnanna S.A. og S.E. og hefur sá síðarnefndi dágóða forystu.  Stigatala 10 efstu manna þegar einu móti er ólokið er annars þessi:

 

Tómas V. Sigurðarson	58
Jón Kristinn Þorgeirsson	54
Sigurður Eiríksson	45,5
Sigurður Arnarson	39,5
Haki Jóhannesson	34,5
Karl Egill Steingrímsson	23,5
Smári Ólafsson	22,5
Áskell Örn Kárason	16
Hreinn Hrafnsson	12,5
Atli Benediktsson	11,5

Úrslitin ráðast svo nk. fimmtudagskvöld 29. mars. Taflið hefst kl. 20 og er stefnt að því að ljúka syrpunni með fjölmennu og glæsilegu móti.  

Íslandsmót grunnskólasveita:

Góður árangur Glerárskóla

Íslandsmót grunnskólasveita var háð í Rimaskóla í Reykjavík nú um helgina. Alls tóku 26 sveitir þátt í mótinu og sigraði A-sveit Rimaskóla með miklum yfirburðum og varð b-sveit skólans í öðru sæti. Sveit Glerárskóla tók þátt í mótinu, ein sveita utan höfuðborgarsvæðisins og stóð sig með stakri prýði.  Sveitina skipuð þeir Logi Rúnar Jónsson, Hersteinn Bjarki Heiðarsson, Hjörtur Snær Jónsson og Birkir Freyr Hauksson.  Þeir tefldu við allar sterkustu sveitirnar og voru allan tímann í baráttu um verðlaunasæti, en máttu þola 0-4 tap fyrir sigursveitinni í síðustu umferð. Þeir fengu 19 vinninga í 9 umferðum og enduðu í 8. sæti af 26 sveitum. Bestum árangri náði Hjörtur Snær á 3. borði, fékk 5,5 vinning.