Stundarfjórðungsmót

Í dag fór fram skákmót í húsakynnum Skákfélagsins. Umhugsunartími á hverja skák var 15 mínútur á mann. 9 keppendur voru skráðir til leiks og var keppnin bæði jöfn og spennandi. Lokastaðan varð sú að Sigurður Arnarson sigraði með 7 vinninga af 8 mögulegum. Hann tapaði aðeins fyrir Sigurði Eiríkssyni, sem endaði í 2. Sæti með 6,5 vinninga. Jafnir í 3.-4. sæti urðu Hjörleifur Halldórsson og Haraldur Haraldsson með 5,5 vinninga. Það er sérstakt ánæguefni að sjá Harald nálgast sitt gamla form og var hann t.d. með unnið tafl í höndunum gegn sigurvegara mótsins og hefði eflaust unnið þá skák ef hann væri í betri æfingu.

Í næstu sætum urðu Einar Garðar Hjaltason, Sveinbjörn O. Sigurðsson, Haki Jóhannesson, Ari Friðfinnsson og Einar Guðmundsson.

15 mín. mót

Á morgun, sunnudag, kl. 13 verður haldið 15 mínútna mót hjá Skákfélaginu. Viðbúið er að mótið taki nokkuð lengri tíma en fjórðung úr klukkustund þótt um kortermót sé að ræða. Hvernig á því stendur verður ekki upplýst fyrr en á mótstað. Rétt er þó að geta þess að 15 mínútur eru aðeins 1/96 úr sólarhring.

Allir áhugamenn um skáklist og/eða tímaeiningar eru velkomnir.

Haustmóti barna og unglinga frestað

Mótið upphaflega á dagskrá nú á laugardaginn. Ákveðið hefur verið að fresta því vegna ferðar nokkurra unglinga á Unglingameistaramót og Íslandsmót í pilta- og drengjaflokki í Reykjavík nú um helgina.  Mótið verður sett á innan tíðar.