Símon skákmeistari Lundarskóla!

Í Lundarskóla stunda nám tveir af öflugustu skákunglingum landsins. Þegar efnt var til Lundarskólamóts í skák sl. föstudag kom í ljós að enginn úr efstu bekkjum skólans treysti sér til að etja kappi við þá bekkjarbræður, Símon Þórhallsson og Jón Kristin Þorgeirsson. Því var slegið upp móti í yngri flokki (1-7. bekk) en þeir fóstbræður tefldu einvígi sín á milli um skólameistaratitilinn sen Jón bar reyndar á sínum herðum frá því í fyrra. Alls tefldu þeir fimm skákir. Símon byrjaði mjög snarplega og vann tvær fystu skákirnar. Þá vaknaði Jokko til lífsins og vann tvær næstu. En seiglan kom hinum fyrrnefnda til góða í lokaskákinni og var hann krýndur skólameistari eftir 3-2 sigur í einvíginu.

Í yngri flokki mættu 12 keppendur til leiks. Því miður glataðist mótstaflan, en öruggur sigurvegari var Gunnar Aðalgeir Arason úr 7. bekk með fullt hús vinninga, 5 talsins. Á hæla honum kom fimmtubekkingurinn Roman Darri Stevenson Bos með fjóra vinninga. Hálfum vinningi minna fengu þeir Björn Torfi Tryggvason úr 7. bekk og Gunnar Breki Gíslason úr þeim fimmta. Aðrir fengu ögn minna en stóðu sig með prýði. Það er mál manna að Lundskælingar mæti með öflugar sveitir á Íslandsmót grunnskólasveita síðar í vetur!

Skákdagurinn á morgun!

- og fleira markvert.

Á morgun, 26. janúar er Skákdagurinn haldinn hátíðlegur eins og undanfarin ár. Opið hús verður hjá Skákfélaginu frá kl. 13. Þá verður efnt til skákkeppni milli tveggja grunnskóla á Akureyri, Brekkuskóla og Lundarskóla og er stefnt að því að tefla á 10 borðum.  Samhliða þessu verður haldið barnamót ef næg þátttaka fæst. 

Eldri og reyndari kappar eru einnig velkomnir, bæði til að klappa fyrir krökkunum og taka nokkrar bröndóttar, ef svo ber undir.

Fimmta umferð Skákþings Akureyrar fer svo fram nk. miðvikudagskvöld 29. janúar og hefst kl. 18.

Fimmtudagskvöldið 30. janúar verður svo þriðja lota TM-mótaraðarinnar háð. Hlé hefur verið á hraðskákmótum vegna Skákþingsins og er nú kjörið tækifæri fyrir hraðhenta skákmenn að þjóna lund sinni og eðli í dásamlegum klukkubarningi. Mótið hefst kl. 20.

Sigurður einn efstur á Skákþinginu

Í kvöld fór fram 4. umferð Skákþings Akureyrar. Allar skákirnar voru frá 32 til 38 leikir. Fyrstir til að ljúka sinni skák voru Símon Þórhallsson og Tómas Veigar. Hafði Símon hvítt og upp kom kóngindversk vörn. Tómas fór í vafasamt drottningaflan og át eitrað peð í 17. leik. Við það lokaðist drottningin inni og varð hann að gefa hana fyrir hrók. Úrvinnslan var fumlaus hjá Símoni og gafst Tómas upp í 32. leik.

Í skák Andra og Sigurðar var þung undiralda. Andri lék ónákvæmt í seinni hluta miðtaflsins og það nýtti Sigurður sér vel. Peðastaða Andra var viðkvæm og þau tóku að falla hvert á fætur öðru uns Andri gafst upp í 38. leik.

Hjörleifur hafði hvítt gegn Jóni og tefldu þeir lokaða afbrigðið af Sikileyjavörn. Hjörleifur tefldi nokkuð passíft og nýtti Jón sér það vel. Hann skipti upp á virku mönnum hvíts og bætti stöðu sína jafnt og þétt. Að lokum reiddi hann hátt til höggs og hvíta staðan hrundi.  Hvítur gafst upp í 36. leik. Mjög vel teflt hjá Jóni.

Í skák Rúnars og Haraldar kom einnig upp lokaða afbrigði Sikileyjavarnar eða kóngindversk árás. Svartur náði frumkvæðinu og tefldi stíft til vinnings en Rúnar stóðst atlöguna vel og þeir sættust á skiptan hlut í 37. leik.

Skák Loga og Jakobs var í jafnvægi allan tímann. Þeir sömdu jafntefli í 37. leik þegar sýnt þótti að hvorugur kæmist neitt áfram.

Eftir úrslit dagsins leiðir Sigurður Eiríksson mótið með fullt hús stiga og hálfan vinning í forskot á Jón Kristinn og Harald.

Chess-results