Akureyrarmót á morgun!

Mætir meistarinn????

Um leið og við óskum nýböðuðum Norðurlandsmeistara Jóni Kristni Þorgeirssyni til hamingju með titilinn blásum við til SKÁKÞINGS AKUREYRAR í yngri flokkum og SKÓLASKÁKMÓTS AKUREYRAR á morgun kl. 16.30. 

Auglýsing er hér - við vonum  að allt skili sér:

Skákþing Akureyrar í barna- og unglingaflokkum

Skólaskákmót Akureyrar

 

 

 

fer fram mánudaginn 31. mars og þriðjudaginn 1. apríl nk.  Taflið hefst kl. 16.30 báða dagana.

 

Teflt verður um titilinn Skákmeistari Akureyrar í eftirfarandi flokkum:

Barnaflokkur,  fædd 2003 og síðar.

Pilta- og stúlknaflokkur, fædd 2001 og 2002.

Drengja- og telpnaflokkur, fædd 1998-2000.

 

Verðlaunapeningar verða veittir fyrir sigur í hverjum flokki, svo og fyrir þrjú efstu sætin í keppninni samanlagðri.

Nokkur páskaegg verða svo dregin út.

 

Mótið er einnig Skólaskákmót Akureyrar.   Þar er keppt í tveimur aldursflokkum;

yngri flokki (1-7. bekk, þ.e. fædd 2007-2001)

eldri flokki (8-10. bekk, þ.e. fædd 1998-2000). 

Tveir efstu keppendur í hvorum flokki fá þátttökurétt á umdæmismóti í skólaskák sem fer fram strax eftir páska. 

 

Umhugsunartími er 10 mínútur á skákina og verða tefldar 7 umferðir eftir Monrad-kerfi.  Tefldar verða fjórar skákir á mánudegi og þrjár á þriðjudegi.

 

Öllum börnum á grunnskólaaldri heimil þátttaka meðan húsrúm leyfir.

Teflt verður í skákheimilinu í Íþróttahöllinni, (gengið inn að vestan).   Skráning er á staðnum mánudaginn 31. mars frá kl. 16.

Einnig er hægt að skrá sig hjá formanni félagsins í netfangið [e-mail]

Þá er bara að mæta og skemmta sér!

 

 

TM, sjötta lota

Í gær áttust tíu fingrafimir skákmenn við í TM-mótaröðinni í sjötta sinn. Úrslitin sem hér segir:

 

		1	2	3	4	5	6	7	8	9	10
1	Áskell Örn Kárason		1	1	1	1	1	1	1	1	1	9
2	Jón Kristinn Þorgeirsson	0		1	1	1	1	1	1	½	1	7½
3	Tómas V Sigurðarson	0	0		1	1	0	1	1	1	1	6
4	Símon Þórhallsson	0	0	0		1	1	1	0	1	1	5
5	Sigurður Eiríksson	0	0	0	0		1	1	1	1	1	5
6	Smári Ólafsson	0	0	1	0	0		0	1	1	1	4
7	Haki Jóhannesson	0	0	0	0	0	1		½	1	1	3½
8	Logi Rúnar Jónsson	0	0	0	1	0	0	½		0	1	2½
9	Haraldur Haraldsson	0	½	0	0	0	0	0	1		1	2½
10	Karl E Steingrímsson	0	0	0	0	0	0	0	0	0		0

Ekki urðu verulegar breytingar á stigaröð við þessi úrslit, en þó jók meistari Jokko forskot sitt nokkuð, þar sem helstu keppinautar hans voru á öðrum vígstöðvum þetta kvöld. Heildarstigatafla fyrir mótaröðina bíður útreiknings varaformanns, en óstaðfestar fregnir herma að harðsnúinn Jokko sé nú kominn með 50,5 stig, hinn grimmúðlegi Sigurður Arnarson með 37,5, sama og Tómas Veigar og á hæla þeim Rúnar Sigurpálsson (einnig grimmúðlegur) með 36 stig. Þarnæst ofangreindur Áskell (viðurnefni óþekkt) með 31,5 stig. Þar sem sex bestu mótin af átta reiknast í heildaruppgjöri er forskot Jóns Kristins þó e.t.v. minna en sýnist, þar sem hann hefur telft í öllum mótum til þessa og getur því litlu bætt við sig, en hinir eiga meira inni. Sjáum við svo hvað setur.

 

Sjötta lota TM-mótaraðarinnar í kvöld

Eins og títt er á fimmtudagskvöldum verður nú telfd hraðskák TM-syrpunni, sjötta lota af átta. Talfið hefst kl. 20 og engin von til annars en baráttan verði bæði hörð og skemmtileg. Að venju er það hið harðsnúna ungmenni Jón Kristinn Þorgeirsson sem hefur forystuna í syprunni með 43 vinninga. Í humátt á eftir honum koma svo hinir grimmúðlegu skákjöfrar Rúnar Sigurpálsson og Sigurður Arnarson. Aðrir standa þessum nokkuð að baki, en í kvöld gefst tækifæri á að bæta þar úr.