Sumarmótasyrpa, fyrsta mótið 20. júní.

Að venju er skáklífið hér í bæ með rólegasta móti yfir hásumarið. Við reynum þó að láta ekki alveg slokkna á týrunni og stefnum á því að halda a.m.k. eitt hraðskákmót í mánuði nú í sumar. Mótin verða á fimmtudagskvöldum og byrja kl. 20. Allir eru að sjálfsögðu velkomnir á þessi mót, en við leikum okkur að því að útnefna þann sigurvegarar sem fær flesta vinninga í mótunum þremur. 
Fyrir þau sem ekki hafa enn heimsótt Skákheimilið okkar í sínum nýja búningi er líka ærin ástæða til að láta sjá sig.
Mótin verða á þessum dögum:
20. júní
18. júlí
8. ágúst

Allir velkomnir sem fyrr er sagt. Þátttaka kostar þá sem eldri eru 700 kr. í hvert skipti, ókeypis fyrir börn.  Tímamörkin 4-2.

Vormót barna í nýju Skákheimili; Sigþór sigraði.

Skákfélagið hefur nú fengið lyklavöld að nýju að Skákheimilinu í Íþróttahöllinni og öll starfsemin nú flutt úr Rósenborg. Miklar endurbætur hafa verið gerðar á húsnæðinu og ætti það að henta félaginu og iðkendum betur en áður. Við höfum fengið rúmgóða geymslu og eldhús- og snyrtiaðstaða hefur verið stórbætt. Salurinn er alveg uppgerður og ætti rýmið þar að nýtast betur en áður.

Þann 31. maí var fyrsta mótið haldið í hinum nýuppgerða sal, vormót barna sem um leið var fimmta mótið í mánaðamótaröð vormisseris. Tíu börn mætti til leiks á mótinu og eins og oft áður varð Sigþór Árni Sigurgeirsson hlutskarpastur, vann allar sínar skákir, sex að tölu. Í öðru og þriðja sæti urðu þeir Valur Darri Ásgrímsson og Damian Jakub Kondracki. Af yngri börnunum (f. 2014 og síðar), varð Nökkvi Már Valsson hlutskarpastur, sjónarmun á undan Gabríel Mána Jónssyni. 

Sigþór safnaði flestum vinningum í mánaðarmótaröðinni, næstur varð Viacheslav Kramarenko og þriðji Valur Darri Ásgrímsson. Í yngri flokki fékk Gabríel Máni Jónsson flesta vinninga en næstur honum kom Skírnir Sigursveinn Hjaltason.

Þann 13. júní næstkomandi munum við svo fagna opnuninni með pompi og prakt og er öllu áhugafólki og velunnurum félagsins boðið til þeirrar samkomu. Þetta verður auglýst síðar.    

Glæsilegu Landsmóti í skólaskák lokið - Markús Orri vann elsta flokkinn.

Landsmótið í skólaskák var háð hér á Akureyri um helgina. Teflt var í Brekkuskóla.  Keppt var í þremur aldursflokkum, tólf keppendur í hverjum flokki sem unnið höfðu sér rétt til þátttöku á svæðismótum sem haldin hafa verið víðsvegar um land að undanförnu.
Á yngsta stigi (1-4. bekkur) kom sigurvegarinn frá Ísafirði, Karma Halldórsson. Annar varð Haukur Víðis Leósson úr Hlíðaskóla í Reykjavík og þriðji Pétur Úlfar Ernisson úr Langholtsskóla.
Á miðstigi (5-7. bekkur) bar Birkir Hallmundarson sigur úr býtum, en annar varð Sigurður Páll Guðnýjarson. Þeir koma báðir úr Lindaskóla í Kópavogi. Þriðji varð Jósef Ómarsson úr Landakotsskóla, en bestum árangri landsbyggðarkeppenda náði Sigþór Árni Sigurgeirsson úr Oddeyrarskóla, sem varð fjórði.
Á elsta stigi var keppnin um sigurinn mjög hörð og urðu þeir Markús Orri Óskarsson úr Síðuskóla og Mikael Bjarki Heiðarsson úr Vatnsendaskóla í Kópavogi efstir og jafnir. Markús Orri Jóhannsson úr Háteigsskóla varð þriðji og Húsvíkingurinn Kristján Ingi Smárason fjórði.
Tveir efstu menn þurftu því að tefla einvígi um meistaratitilinn þar hafði betur með sigri í lokaskákinni og fékk 2,5 vinninga gegn 1,5. Markús Orri kórónaði þar með frábæran árangur sinn á undanförnum mánuðum og er greinilega kominn í hóp sterkustu skákmanna landsins í sínum aldursflokki. Akureyringar hafa reyndar oft náð góðum árangri í skólaskákinni og oft borið sigur úr býtum, þótt líklega séu liðin ein tíu ár síðan það gerðist síðast.

Myndin er er tekin af Anastasiu Leonovu Kramarenko meðan á úrslitaeinvíginu í elsta flokki stóð.

Öll úrslit og lokastöðuna í einstökum flokkum er að finna á chess-results. 
Einnig umfjöllun og myndir á skak.is og fb-síðu Skákfélagsins.