Andri nær forystu

Fjóðrða umferð Skákþingsins var tefld í dag. Þá áttust m.a. við forystusauðirnir Jón Kristinn og Andri. Eins og í haustmótinu var Andri erfiður við félaga Jokko; náði heljartaki á honum eftir byrjunina og leiddi taflið smám saman til sigurs. Þá vann Ulker góðan sigur á Heiðari og Ágúst Ívar lagði Gabríel Frey að velli í viðureign ungu mannanna. Haraldur fékk og vinning í skákinni við Alex, sem mætti ekki til leiks. Þá gerðu þeir Hreinn og Sveinbjörn sannkallað stóirmeistarajafntefli. Karl og Tómas munu tefla sína skák á mánudagskvöld og verður röðun fimmtu umferðar birt eftir að henni lýkur.

 

Skákæfingar og mót fyrir börn og unglinga

Æfingatímar á vormisseri 2017 (til maíloka) sem hér segir:

Mánudaga 16.30-17.30  Yngri börn og byrjendur 

Þriðjudaga 16-17.30   Opið hús fyrir áhugasöm börn á grunnskólaaldri

Miðvikudaga 16.45-18.00 Framhaldsflokkur (frá 2005)

Æfingagjöld kr 5000 fyrir önnina - frítt á opið hús.

 

Fjórir skólameistarar á Skákdeginum!

Í dag, á skákdaginn 26. janúar, voru háð skólamót í fjórum grunnskólum á Akureyri. Mótshaldið var einkum kynnt í 3-6. bekk, en öllum þó heimil þátttaka. Öll fóru mótin vel fram og voru þátttakendur alls 81. Tefldar voru fimm umferðir. Við munum tíunda úrslitin síðar, en skólameistarar urðu þessir:

Skákmeistari Brekkuskóla:  Gabríel Freyr Björnsson

Skákmeistari Lundarskóla:  Ívar Þorleifur Barkarson

Skákmeistari Naustaskóla:  Ingólfur Árni Benediktsson  

Skákmeistari Síðuskóla:    Daði Örn Gunnarsson

Við óskum hinum nýbökuðu meisturum til hamingju með árangurinn og meistaratitlana. 

Í kvöld var svo haldið opið mót í Skákheimilinu. Úrslit voru ekki kunn þegar blaðið fór í prentun, en það er til tíðinda að Alékínsvörn var beitt í fjölmörgum skákum kvöldsins. Sýnir það best gróskuna í skáklífinu hér norðan heiða. 

Myndirnar eru frá Brekkuskólamótinu, teknar af Dalrós Halldórsdóttur.