Íslandsmót skákfélaga - SA með tvær sveitir í efstu deild!

Síðari hluti Íslandsmóts skákfélaga (deildakeppninnar) fór fram í Rimaskóla í Reykjavík um síðustu helgi. Skákfélagið tefldi fram fjórum sveitum, einni í hverri deild. Gengi sveitanna var æði mismunandi.  Forföll voru heldur meiri en venjulega og mönnun svo margra sveita stóð tæpt. Telft er á átta borðum í 1. deild, sex borðum í neðri deildum. Fjórar umferðir voru telfdar í fyrstu deild, þrjár í hinum þremur. 

A-sveitin var eftir fyrri hlutann rétt neðan við miðja deild og gat lent í fallbaráttu ef síðari hlutinn tefldist ekki vel. Það fór enda svo að falldraugurinn andaði aðeins ofan í hálsmálið á keppendum, en að lokum hafnaði sveitin í 7. sæti af tíu, þremur vinningum frá fallsæti. Af einstökum keppendum stóð Jón Kristinn Þorgeirsson sig langbest, fékk 3,5 vinning úr fjórum skákum og lagði m.a. alþjóðlegan meistara að velli á glæislegan hátt. Skákfélagið Huginn varð Íslandsmeistari eftir harða baráttu við Taflfélag Reykjavíkur. Skákfélag Reykjanesbæjar féll í aðra deild ásamt b-sveit TR. Öll úrslit má sjá á chess-results

B-sveitin var í öðru sæti í 2. deild eftir fyrri hlutann í mjög jafnri deild. Árangurinn í síðari hlutanum einkenndist af miklu öryggi og sæti í fyrstu deild orðið mjög líklegt fyrir síðustu umferð. Þá brást mönnum ekki bogalistin og tryggði sveitn sér sæti í deild hinna bestu að ári. Eflaust verður róðurinn þar nokkuð þungur, en við vitum af reynslu að okkar menn eiga fullt erindi á þann slag. Sveit Taflfélags Garðabæjar vann deildina, en tvær efstu sveitirnar vinna sig upp. Úr deildinni féllu Skákfélag Íslands og b-sveit Skákdeildar Fjölnis. Árangur allra liðsmanna var í góðu meðallagi, en best gekk Jóni Þ.Þór í síðari hlutanum, hann tefldi tvær skákir og vann þær báðar. Öll úrslit annars á Chess-results. 

C-sveitin átti frekar erfitt uppdráttar í 3. deild, en var þó aldrei í fallhættu. Sveitin vann þrjár viðureignir, tapaði þremur og gerði jafnt í einni. Bestum árangri liðsmanna náði Sigurður Eiríksson, en hann telfdi einnig eina skák með b-sveit með góðum árangri. Hrókar alls fagnaðar unnu deildina og færast upp í aðra deild ásamt Skákfélagi Selfoss og nágrennis. Öll úrslit annars á chess-results.

Myndina sem fylgir þessari frétt tók Sigurbjörn Ásmundsson af gamalkunnum skákjöfri, Hjörleifi Halldórssyni, félaga í c-sveit SA. 

D-sveit félagsins var að mestu skipuð ungum skákmönnum á grunnskólaaldri sem voru nú að heyja frumraun sína í þessari keppni. Reynsluleysi þeirra fór varla á milli mála í fyrri hluta keppninnar, en greinilegt var að þeir réðu mun betur við verkefnið nú í síðari hlutanum. Því miður átti Akureyrarmeistarinn í unglingaflokki ekki heimangengt, en gamall formaður félagsins og heiðursfélsgi, Karl Steingrímsson, kom þá til liðs við sveitina og telfdi sem fyrirliði á fyrsta borði. Munaði um minna, enda kom sér vel að hafa reyndan mann sem liðsstjóra. Karl fékk tvo vinninga, en bestum árangri náði Arnar Smári Sigýjarson, sem vann allar sínar skákir, þrjár að tölu. Sveitin vann þrjár viðureignir af sjö og hafnaði í 8. sæti af 14. B-sveit Víkingaklúbbsins vann deildina. Chess-results 

Íslandsmót skákfélaga er stærsta verkefni félagsins og kemur öllum félagsmönnum við. Gera má ráð fyrir að 35-40 manns komi að keppninni á hverju ári. Í heild má segja að árangurinn nú hafi verið í meðallagi, ef undan er skilinn glæsileg frammistaða b-sveitarinnar. Mikil vinna er framundan við undirbúning fyrir næsta ár þegar félagið þarf að geta mannað tvær árra manna sveitir í efstu deild með sóma. Dagskráin er líka lengri í þeirri deild en hinum, þar sem sveitirnar eru tíu talsins og telfdar níu umferðir. Mótið fyrir leiktíðina 2017-2018 byrjar væntanlega í október. 

Skákbúðir á Laugum 1-2. apríl

Dagskrá:

Við byrjum á laugardeginum kl. 10 - stífar æfingar fram að hádegishléi. Síðan enn stífari kl. 13-17, þó með hléum fyrir útivist og e.t.v. sundferð. Á sunnudegi æfingar kl. 10-12. og kl. 13 Norðurlandsmót yngri flokka, tekur tvo til tvo og hálfan tíma. Þátttaka í mótinu óháð þátttöku í skákbúðunum að öðru leyti.

Frekari upplýsingar:

Leiðbeinendur: Höfuðpaur Björn Ívar Karlsson, FIDE-þjálfari. Honum til aðstoðar Sigurður Arnarson (FI), Áskell Örn Kárason (FT) og Hermann Aðalsteinsson (SB).

Staður: Seigla - miðstöð sköpunar á Laugum.

Þátttaka ókeypis

Gisting fyrir SA-félaga möguleg í sumarhúsi ÁÖK á Litlu-Laugum. Gott pláss fyrir a.m.k. 6-8 manns. Líka eldhúsaðstaða.

Þátttakendum ráðlagt að hafa með sér föt til útivistar og sundföt.

Markhópur: Hentar öllum 7-15 ára sem kunna mannganginn. Flokkaskipt ef nausyn krefur.

Athygli Framhaldsflokks hefur verið klárlega verið vakin á þessu, en við mælum líka með bíðunum fyrir okkar yngri iðkendur.

 

Skráning hér á Facebook. Því fyrr, því betra!

 

Fannar Breki sigurvegari Skákþings Akureyrar - yngri flokka

Þeir Fannar Breki Kárason og Arnar Smári Sigrúnarson urðu efstir og jafnir á mótinu um síðustu helgi, eins og komið hefur fram hér á síðunni. Báðir tryggðu sér það með Akureyrarmeistaratitil í skólaskák, hvor í sínum flokki. Til að skera úr um sigurvegara á Skákþinginu og titilin skákmeistari Akureyrar í yngri flokkum var efnt til einvígis sem fór fram í Skákheimilinu í gær. Fannar vann fyrstu skákina nokkuð örugglega eftir að Arnar lék af sér manni í upphafi miðtaflsins. Í annarri skákini snerist þetta við; Arnar náði undirtökum strax eftir byrjunina og nýtti sér yfirburði sína til að vina öruggan sigur. Þar sem staðan var þá jöfn telfdu þeir eina skák til úrslita. Var hún sviptingasöm eins og efni stóðu til. Eftir að hafa fengið góða stöðu úr byrjunini lék Fannar illa af sér og tapaði manni. Hann klóraði þó í bakkann og á örlagastundu uggði Arnar ekki að sér, hótaði máti með kröftugum riddaraleik en sást yfir að hann gaf um andstæðingum leið færi á mái í leiknum. Fannar greið tækifærið og vann þar með einvígið og Skákþingið.  Við óskum honum til hamingju með sigurinn, en báðir mega þeir félagar vera stoltir af árangrinum og framsókn sini á skáklsviðinu.