Æfingatímar og haustdagskrá

Nú líður að lokum sumarleyfis skákmanna og starfsemin í Skákheimilinu að hefjast af fullum krafti.
Startmótið er að venju fyrsti viðurðurinn og er blásið til þess sunnudaginn 1. september kl. 13.00.
Næsti viðburður verður haustmótið, sem er meistaramót félagsins.  Mótið verður með nokkuð óvenjulegu sniði í þetta sinn og hefst með atskákum dagana 12-14. september, en lýkur síðar í mánuðinum með stuttu kappskákmóti. Fyrirkomulagið mun taka eitthvað mið af því hversu margir koma til leiks, en allt verður þetta auglýst nánar þegar nær dregur.

Fyrstu helgina í október munum við svo að venju taka þátt í Íslandsmóti skákfélaga og vonumst til að geta mannað a.m.k. þrjár sveitir að þessu sinni.

 

Þá liggur fyrir dagskrá barna- og unglingaæfinga.
Mánudagar kl. 16:45-18:00  Almennur flokkur
Þriðjudagar kl. 14:30-16:00  Framhaldsflokkur (sjá þó hér á eftir)
Fimmtudagar kl. 14:30-16:00 Opinn æfingatími

Til frekari skýringa:
Almenni flokkurinn er fyrir yngri börn og skemmra komna, en framhaldsflokkurinn fyrir þau sem þegar eru komin með nokkur grunn. Aldursskiptingin er ekki hárnákvæm, en að jafnaði má gera ráð fyrir að almenni flokkurinn henti betur börnum 11 ára og yngri.

Fimmtudagstíminn er svo opinn öllum eins og nafnið ber með sér og í raun ekkert því til fyrirstöðu að þau áhugasömustu mæti í alla þrjá tímana.
Almenni flokkurinn hefst 26. ágúst.  Daginn eftir verður skráning í framhaldsflokk. Iðkendur eru velkomnir kl. 14.30, en við gerum líka ráð fyrir að hafa tíma fyrir foreldraspjall alveg framundir kl. 17. Framhaldsflokkurinn hefst svo fyrir alvöru þann 10. september og fyrsti opni æfingatíminn verður einnig í þeirri viku.

Ekki er ólíklegt að reynt verði að bjóða upp á fleiri opna æfingatíma og er foreldrum bent á að fylgjast með tilkynningum frá Sportabler og á facebook-síðu félagsins. En við byrjum svona og sjáum svo til.

Þetta misseri verður innheimt eitt æfingagjald fyrir alla iðkendur, kr. 10.000. Gegn því gjaldi geta þau sótt allar æfingar sem í boði verða, auk móta á vegum félagsins, hvort sem um er að ræða almenn mót eða barnamót.

Þau Elsa María Kristínardóttir og Hilmir Vilhjálmsson munu áfram sjá um þjálfunina í almennaflokknum, en umsjón með framhaldsflokknum verður í höndum Áskels Arnar Kárasonar. Aðrir leiðbeinendur koma til skjalanna eftir þörfum.

 

 

Ágústmótið á fimmtudaginn!

8. ágúst kl. 20.00. Við prófum líklega 5-3 tímamörkin aftur!

Júlímót með tilbrigðum

Átta skákmenn mættu í Skákheimilið til þess að taka þátt í heimsmetstilraun FIDE í gær, þann 20. júlí. Skákmót var haldið með tilbrigðum þar sem sumir tefldu aðeins fleiri skákir en aðrir. Áskell Örn Kárason fékk flesta vinninga, eða sjö úr níu skákum; Símon Þórhallson fékk sex og hálfan.
Aðrir fengu minna en voru þó fullsæmdir að sínu. Mættir voru:
Anton Orri Jóhansson
Áskell Örn Kárason
Haraldur Haraldsson
Karl Egill Steingrímsson
Níels Ragnarsson
Nökkvi Már Valsson
Símon Þórhallsson
Stefán G. Jónsson
Sérstaka athygli vakti þátttaka tveggja félaga sem heimsóttu okkur úr fjarlægum landshluta, þeirra Haraldar og Níels. Megi þeir koma sem oftast!