Síðbúin frétt; Rúnar og Sigurjón unnu startmótið

Hið hefðbundna Startmót SA fór fram þann 1. september sl. Átta keppendur mættu til leiks og var tefld tvöföld umferð. Jafnir og efstir urðu Langmýringurinn Rúnar Sigurpálsson og Hríseyingurinn Sgurjón Sigurbjörnsson. Þeir unnu alla andstæðinga sína en gerðu jafntefli í innbyrðis skákum. Þetta má sjá á chess-results. 

Aðalfundur 26. september

Aðalfundur Skákfélags Akureyrar verður haldinn þann 26. september kl. 20.30, í Skákheimilinu (að lokinni 2. umferð í úrslitum Haustmótsins.

Á dagskrá verða lögbundin aðalfundarstörf. Má þar nefna að flutt verður skýrsla stjórnar og reikningar lagðir fram fyrir síðasta fjárhagsár. Þá verður ný stjórn félagsins kjörin.  Breytingar á lögum félagsins koma til atkvæða, ef slíkar tillögur berast. Þær þurfa að hafa borist formanni á simnet.is ekki síðar en degi fyrir aðalfund.

 
Aðalfundur fer með æðsta vald félagsins og ályktunum hans ber að framfylgja. Félagsmenn eru hvattir til að mæta, boðið verður upp á kaffi og kleinur. 

Undanrásum lokið - hart barist um sjötta sætið!

Í dag, laugardaginn 14. september voru tefldar tvær síðustu umferðirnar af sex í undanrásum Haustmóts SA. Þeir Áskell Örn og Markús Orri voru báðir í þægilegri stöðu eftir fyrri umferðirnar fjórar og tryggðu sig örugglega í úrslitin. Baráttan um hin sætin fjögur í úrslitakeppninni var hisvegar jöfn og tvísýn. Þegar upp var staðið voru þrír keppendur jafnir að vinningum í sjötta sæti og þurftu því aukakeppni til að skera úr um það hver þeirra kæmist í úrslitakeppnina. Tefldu þau hraðskákir sín á milli, en að öðru leyti voru tefldar atskákir í undanrásunum. Lokastaðan

1. Áskell Örn Kárason         5,5
   Markús Orri Óskarsson      5,5
3. Smári Ólafsson             4
4. Karl Egill Steingrímsson   3,5
5. Stefán G. Jónsson          3,5
6. Sigurður Eiríksson         3   +3
7. Benedikt Stefánsson        3   +2
8. Sigþór Árni Sigurgeirsson  3   +1
9. Harpa Hrafney Karlsdóttir  3   +0
10. Viacheslav Kramarenko     2,5
    Guðmundur Geir Jónsson    2,5
12. Eymundur Eymundsson       2
    Valur Darri Ásgrímsson    2
14. Björgvin Elvar Björgvinsson 1,5
    Kacper Burba              1,5
16. Hrafn Arnarson            1
    Nökkvi Már Valsson        1
Alls tefldu 12 skákmenn allar skákirnar sex; þeir Sigurður, Eymundur og Valur Darri tóku þátt í fjórum síðustu umferðunum, en þeir Hrafn og Nökkvi Már tefldu einungis tvær fyrstu.

Eins og áður segir tefla sex efstu menn til úrslita um sigurinn á mótinu, einfalda mumferð, allir-við-alla. Keppni hefst síðar í vikunni.