Geðveik úrslit í geðveiku móti.

Í gær fór fram geðveikt skákmót á vegum Skákfélags Akureyrar. 18 skákmenn mættu og tóku þátt í hraðskák þar sem tímamörkin voru 5 mín og 3 sek. að auki fyrir hvern leik. Aðgangseyrir rann óskertur til Grófarinnar og sumir greiddu meira en farið var fram á. Það á við um heiðursfélaga, unglinga og venjulega félagsmenn. Samtals söfnuðust því 22 þúsund krónur og tók Eymundur Eymundsson við peningunum í mótslok.
Í þakkarávarpi sínu sagði Eymundur m.a. „Það gleymist stundum í forvörnum hvað Skákfélag Akureyrar hefur unnið frábært forvarnarstarf og menn unnið óeigingjarna vinnu með börnum og ungmennum gegnum tíðina. Eitt elsta eða elsta félag Akureyrar hefur verið og er mikils virði fyrir samfélagið sem hefur alið upp flott ungmenni. Fyrir það ber að þakka.“ Í upphafi móts sagði Eymundur frá Grófinni og starfseminni sem þar fer fram. 

Í lok móts voru dregin út verðlaun sem styrktaraðilar mótsins gáfu. Kertastjaki og kerti frá Blómabúð Akureyrar hlaut Haki Jóhannesson. Tafl að verðmæti 5000 krónur, sem Penninn Eymundsson gaf, hafnaði hjá Karli Agli Steingrímssyni. Að lokum var dregið út inneignarnóta frá Joe´s að upphæð kr. 5000.- Það hlaut heiðursmaðurinn Smári Ólafsson sem bar sigur úr bítum í mótinu sjálfu. Hann hafði lýst því yfir fyrir mót að hann ætlaði að afsala sér verðlaunum og láta þau renna til málefnisins. Því afhenti hann einum keppanda, Stefáni Júlíussyni, sem gjarnan hefur leitað til Grófarinnar, vinninginn.

Tefldar voru 9 umferðir eftir monradkerfi og urðu úrslit þau að í 4. sæti lenti Ólafur Kristjánsson með 6 vinninga. Hann leiddi mótið lengi vel og var í 1. sæti í 4 umferðir og tefldi á þeim tíma glæsilegar skákir en fataðist flugið undir lok móts.
Hálfum vinningi og einu sæti ofar, með 6,5 vinninga varð Tómas Veigar Sigurðarson.
Í 2. sæti lenti Haraldur Haraldsson með 7 vinninga og í efsta sæti lenti Smári Ólafsson Hlaut hann 7,5 vinninga af 9 mögulegum.

Mikla athygli vakti gengi hins unga Fannars Breka, sem á laugardag sigraði á Haustmóti Skákfélagsins í yngri flokkum.   Hlaut Fannar 5 vinninga af 9 mögulegum í gær og tefldi á 1. borði í 2 síðustu umferðunum. Máttu margir reyndir kappar líta hann öfundaraugum vegna velgengninnar.

Myndir frá mótinu má finna á Facebooksíðu SA.