Haustmót SA - Arionbankamótið

Nú er lokið haustmóti Skákfélags Akureyrar, sem er meistaramót félagsins. Mótið er nú - eins og tvö undanfarin ár - haldið í samvinnu við Arionbanka, sem styður myndarlega við mótshaldið. Í þetta sinn voru níu keppendur skráðir til leiks, en einn hætti eftir tvær umferðir og reiknast skákir þess keppanda því ekki.

Snemma var ljóst hverjir myndu öðrum fremur berjast um sigurlaunin í þessu móti. Þar komu til skjalanna tveir yngstu keppendurnir, Jón Kristinn Þorgeirsson og Símon Þórhallsson, báðir fædddir árið 1999 og lærifaðir þeirra og helsti þjálfari, Sigurður Arnarson, sem er fæddur nokkrum árum fyrr. Eins og sjá má af síðustu færslu, tókst Jóni að ná Símoni á lokametrunum með sigri í innbyrðis skák þeirra og í lokaumferðinni í dag gat Sigurður náð nemendum sínum með því að leggja nafna sinn Eiríksson von Isafjord að velli. Arnarson galt þess þó að hafa svart og eftir nokkrar flækjur sat hann í endatafli með peði minna en jafntefli varð þó raunin.  Þar með varð hann hálfum vinningi á eftir piltunum og þarf að sjá á bak meistaratitlinum til annars þeirra.   Skák Andra Freys og Kristjans Hallberg lauk einnig með jafntefli, enda var hún i góðu jafnvægi allan tímann. Það sama er ekki hægt að segja um þriðju skák kvöldsins, þar sem Haraldur Haraldsson gerði harða hríð að Karli Agli, sem þó er ekki þekktur fyrir að gefa sitt eftir baráttulaust. Það sýndi sig líka að Haraldur missti þráðinn í tímahraki og staða hans sem var afar vænleg um tíma, hrundi saman. Þar með lagði kokkurinn stýrimannin að velli. 

Lokastaðan í mótinu er því þessi:

1-2. Jón Kristinn Þorgeirsson og Símon Þórhallsson 5,5

3. Sigurður Arnarson                                                 5

4. Sigurður Eiríksson                                                 4

5. Andri Freyr Björgvinsson                                       3

6-7. Haraldur og Karl Egill                                         2

8. Kristjan Hallberg                                                   1

Sjá nánar á Chess-results.

Haustmótinu lýkur svo nk. sunnudag með hraðskákmóti og verða þá afhent verðlaun. Reyndar bíður þeirra félaga sem urðu efsta sæti úrslitakeppni um meistaratitil félagsins. Sú keppni bíður þess að Símon - sem nú er á förum á Evrópumeistaramót ungmenna í Georgíu - komi aftur heim.