Skákþing Akureyrar - Landsbankamótið:

Jón Kristinn yngsti meistari sögunar, Haraldur og Andri Freyr næstir

Í gær lauk Landsbankamótinu, sem jafnframt var Skákþing Akureyrar, hið 76. í röðinni. Eins og áður hefur komið fram var sigur Jóns Kristins þegar orðinn staðreynd fyrir lokaumferðina. Hann sat reyndar að tafli á Norðurlandamótinu í skólaskák í Danmörku þennan dag en skák hans við Tómas Veigar Sigurðarson í lokaumferðinni sem var flýtt vegna utanfarar Akureyrarmeistarans hafði þá lokið með jafntefli.  Baráttan í gær stóð því öðru fremur um annað og þriðja sætið á mótinu og var þar ekkert gefið eftir frekar en fyrri daginn.  Lyktaði þeim slag þannig, að Haraldur meistari fyrra árs náði öðru sætinu eftir að hafa lagt Símon að velli í flókinni skák. Sigurður Eiríksson, sem var jafn Haraldi fyrir umferðina, mátti hinsvegar játa sig sigraðan af Jakobi Sævari og missti þá fram úr sér Andra Frey, sem sneri töpuðu endatafli sér í vil gegn Rúnari. Loks lagði Hjörleifur Loga rúnar að velli. Lokastaðan blasir því við sem hér segir:

		ísl. stig	1	2	3	4	5	6	7	8	9	10	vinn.
1	Jón Kristinn Þorgeirsson	1861		1	½	1	1	1	½	1	½	1	7,5
2	Haraldur Haraldsson	2003	0		½	0	1	1	1	½	1	1	6
3	Andri Freyr Björgvinsson	1648	½	½		0	½	½	1	1	½	1	5,5
4	Sigurður Eiríksson	1923	0	1	1		0	0	1	1	0	1	5
5	Hjörleifur Halldórsson	1802	0	0	½	1		1	0	½	1	1	5
6	Símon Þórhallsson	1595	0	0	½	1	0		1	0	1	1	4,5
7	Tómas V Sigurðarson	1928	½	0	0	0	1	0		1	1	1	4,5
8	Rúnar Ísleifsson	1680	0	½	0	0	½	1	0		½	1	3,5
9	Jakob Sævar Sigurðsson	1700	½	0	½	1	0	0	0	½		½	3
10	Logi Rúnar Jónsson	1447	0	0	0	0	0	0	0	0	½		0,5

Sigur Jóns Kristins Þorgeirssonar á þessu gamalgróna móti er sögulegur.  14 ára gamall er hann langyngsti Akureyrarmeistari sögunnar, rúmum þremur árum yngri en Rúnar Sigurpálsson var þegar hann vann sinn fyrsta meistaratitil árið 1990. Jón var vel að sigrinum kominn og sýndi nú meiri yfirvegun í skákum sínum en áður; var aðeins í taphættu í einni skák.   Það var einmitt gegn Andra Frey, sem þarna átti líklega sitt besta mót. Þriðji yngismaðurinn sem lét til sín taka í toppbaráttuni var svo Símon Þórhallsson, sem missti naumlega af verðlaunasæti með töpum í síðustu skákum sínum tveimur. Allir eru þessir ungu menn í hraðri framför. Kollega þeirra, Logi Rúnar var hinsvegar of mistækur í þetta sinn. Hann sýndi það þó með taflmennsku sinni að hann á fullt erindi í mót af þessu tagi þótt vinningarnir létu á sér standa. Þeir koma næst.  Annað sætið fékk Haraldur verðskuldað. Hann missti þráðinn þegar hann lagði of mikið á stöðuna í hinni mikilvægu skák við Jón Kristin og tapaði svo á tíma í óljósri stöðu gegn Sigurði í næstu umferð. Aðrar skákir tefldi hann af miklu öryggi.   Sigurður hóf mótið með fjórum sigrum, en þá snerist gæfuhjólið honum í óhag.  Skákir hans eru jafnan mjög skemmtilegar og fjörugar.

Í heild var mótið mjög skemmtilegt og mikið um góðar skákir. Þökkum við keppendum þátttökuna og Landsbankanum stuðninginn við mótshaldið. Að venju lýkur Skákþinginu formlega með afhendingu verðlauna að loknu hraðskákmóti Akureyrar nk. sunnudag 23. febrúar.

Sjá einnig öll úrslit á Chess-results.