Velheppnuðu afmælisskákmóti lokið

Icelandic open - 100 ára afmælisskákmóti Skákfélagsins lauk laugardaginn 1. júní. Telfdar voru 9 umferðir og þátttakendur voru 59. Hollenski stórmeistarinn Ivan Sokolov vann mótið. Hannes Hlífar Stefánsson varð í öðru sæti og hreppti þar með titilinn "Skákmeistari Íslands". Síðasta umferðin var dramatísk, en fyrir hana stóð Héðinn Steingrímsson best að vígi í baráttunni um hinn eftirsóknarverða titil. Hann tapaði þó sinni skák gegn svíanum Tiger Hillarp Persson meðan Hannes lagði Jón Viktor Gunnarsson að velli. 

Íslandsmeistari kvenna varð Lenka Ptácniková og Íslandsmeistari ungmenna (U-22) varð Vignir Vatnar Stefánsson.

Alls tóku 17 Skákfélagsmenn þátt í mótinu og stóðu sig flestir með sóma og sumir reyndar frábærlega.  Flesta vinninga fengu þeir Mikael Jóhann Karlsson, Símon Þórhallsson, Stefán Bergsson og Ólafur Kristjánsson, eða fimm og hálfan.  Símon var hársbreidd frá því að hreppa ungmennatitilinn og allir fjórir í efri hluta mótsins frá upphafi og glímdu við sterka andstæðinga.  Mikael lagði stórmeistara að velli, Stefán hefði náð verðlaunasæti með sigri í lokaumferðinni og engin ellimerki voru á taflmennsku Ólafs, sem er á 77. aldursári. Hann lagði m.a. að velli fyrrverandi Íslandsmeistara Guðmund Kjartansson. Annar öldungur, hinn sjötugi Stefán G. Jónsson, sem nú var að taka þátt í sínu fyrsta alþjóðlega móti, hækkaði mest allra um heil 109 stig!   

Ungstirnin Arna Dögg Kristinsdóttir og Markús Orri Óskarsson hlutu hér eldskírn sína á stóra sviðinu, ef svo má segja. Eins og vænta mátti var róður þeirra nokkuð þungur, en bæði fengu þau tvo vinninga og ættu að fá nafn sitt skráð á stigatöflu alþjóðaskáksambandsins um næstu mánaðarmót. Þar með er stórum áfanga náð. 

Lokastöðuna á mótinu má finna á Chess-results.

Fjölmargar myndir af mótinu má finna á Facebook síðu mótsins, https://www.facebook.com/Icelandic-Open-2019-Akureyri-Chessclub-100-years-990618817811917/