Jón með silfur í Færeyjum

Í dag lauk Norðurlandamótinu í skólaskák sem tefld var um helgina í Færeyjum. Teflt var í fimm flokkum, tveir keppendur frá hverju Norðurlandanna í hverjum flokki. Við Skákfélagsmenn áttum 2 keppendur í mótinu og kepptu þeir í A- og B-flokkum.

Í flokki A voru keppendur fæddir 1995-1997. Þann flokk vann Dagur Ragnarsson og óskar Skákfélagið honum hér með til hamingju með frábæran árangur. Hann fékk 5 vinninga í 6 skákum. Í þessum flokki tefldi einnig stórmeistarabaninn Mikael Jóhann Karlsson. Þeir félagar tefldu saman í síðustu umferð og tryggði Dagur sér sigur með því að vinna Mikka og því ergir þetta tap okkur ekki svo mikið. Annars stóð Mikael sig nánast á pari við það sem við mátti búast af styrkleikalistanum. Hann hlaut 3 vinninga af 6 mögulegum og endaði 6. sæti. Það er sæti neðar en styrkleikalistinn spáði fyrir um. Mikael tapar 4 skákstigum á mótinu sem er aðeins brot af því sem hann vann sér inn með frábærri frammistöðu á Skákþingi Reykjavíkur.

B-flokkurinn var fyrir keppendur sem fæddir eru 1998-1999. Þar áttum við einnig einn keppanda. Hann er á yngra árinu og heitir Jón Kristinn Þorgeirsson. Hann tefldi mjög vel á mótinu og endaði í 2. sæti á eftir Fide-meistaranum Lars Oskar Hauge. Þeir gerðu reyndar jafntefli í 1. umferð mótsins en Hauge þessi er með 2362 alþjóðleg skákstig. Auk silfursins í sínum flokki fékk Jón 71 skákstig í hattinn og árangurinn samsvaraði 2289 skákstigum.
Til hamingju með árangurinn!