Frábær árangur Mikaels og Jóns Kristins!

Íslandsmót í flokki 15 ára og yngri og 13 ára og yngri var háð í Reykjavík um helgina. Fimm unglingar frá Skákfélagi Akureyrar tóku þátt í mótinu og náðu mjög góðum árangri.

Þeir Mikael Jóhann Karlsson og Jón Kristinn Þorgeirsson gerðu sér lítið fyrir og unnu báða titlana sem í boði voru í flokki pilta og drengja. Mikael vann alla níu andstæðinga sína örugglega og varð tveimur vinningum fyrir ofan næsta mann, sem var einmitt félagi hans Jón Kristinn!  Sá síðarnefndi skaut þar mörgum eldri og reyndari ref fyrir rass og vann flokk 13 ára og yngri., þótt hann sé aðeins 11 ára. 

Auk þeirra tefldu þeir Andri Freyr Björgvinsson, Hersteinn Heiðarsson og Logi RúnarJónsson á mótinu og náðu allir prýðisárangri, m.a. hefði Andri með smá-heppni getað krækt í þriðja sætið á mótinu.  Framtíðin er því sannarlega björt hjá Skákfélagi Akureyrar ef þessir ungu menn halda áfram að sinna skákíþróttinni jafn dyggilega og þeir hafa gert að undanförnu.

Við óskum þeim öllum hjartanlega til hamingju með glæsilegan árangur.  

• Mótið hjá Chess-Results
• Myndaalbúm mótsins

Athugasemdir

[Skákfélagið Goðinn, 1.11.2010 kl. 11:34]

Til hamingju með flottan árangur hjá strákunum !

[Árný Hersteinsdóttir (IP-tala skráð) 1.11.2010 kl. 16:50]

Sannarlega flottir strákar þarna á ferð. Til hamingju með frábæran árangur.