Keppni kvöldsins felld niður vegna veðurs

Komið hefur í ljós að veður, færð og veðurspá er á þann hátt að óráðlegt er að ferðast að ráði um bæinn. Einkum á það við þegar líður á kvöldið. Að vísu er óvíst að veðrið hafi teljandi áhrif á skákiðkun innandyra en óvíst er að keppendur komist á áfangastað og enn ólíklegra að þeir komist heim aftur. Því hefur verið ákveðið að fella niður keppni kvöldsins.
Næsta mót er á sunnudag kl. 13.00. Þá verða tefldar 10 mín. skákir.

Opna mótið í Rúnavík

Eins og kunnugt er sitja fimm félagar úr Skákfélaginu nú að tafli í alþjóðlegu móti í Rúnavík í Færeyjum. Eins og vænta má lifa þeir þarna eins og blómi í eggi og njóta gestrisni frændþjóðarinnar. Þegar þetta er fært í letur er fjórum umferðum lokið af níu. Hér að neðan má sjá nánar um árangur hvers og eins með því að smella á viðkomandi nafn.
Efstur Íslendinga er Jón Kristinn Þorgeirsson með þrjá vinninga. Tveir af þeim eru gegn félögum hans úr SA.
Næstur í röðinni er formaður vor; Áskell Örn Kárason með hálfum vinningi minna. Báðir hafa þeir tapað einni skák gegn erlendum stórmeistara og báðir mæta þeir stórmeistara í næstu umferð.
Þriðji í röðinni er Símon Þórhallsson. Hefur hann 2 vinninga og mætir Íslending í næstu umferð.
Fjórði er Haraldur Haraldsson og fimmti er Sigurður Eiríksson. Þeir hafa báðir 1,5 vinninga.

Við sem heima sitjum óskum þeim góðs gengis það sem eftir lifum móts.