Norðanmenn unnu Hverfakeppnina.

Hin hefðbundna hverfakeppni SA var tefld næstsíðasta dag ársins eins og stundum áður. Þátttaka nú var í linara lagi og spurning hvort ekki þurfi að huga að breytingu á fyrirkomulaginu. 
En sumsé: skipt var í lið eftir búsetu og í þetta sinn var línan dregin um Hrafnagilsstræti - ögn sunnar en áður. Sunnanmegismenn tefldu fram fimm köppum, en Norðlingar fjórum. Tefld var bændaglíma - tvöföld umferð.

Leikar fóru þannig að norðrið vann sögulegan sigur, 28 vinningar gegn 12. Reyndar ber að taka fram að ekki var sérstaklena leitað að fjarskiptatækjum eða titrandi kúlum í innviðum keppenda áður en mótið hófst. Kann að vera að þetta hafi haft nokkur áhrif á niðurstöðuna, en úr því verður ekki skorið nú. Hans Niemann var hinsvegar titlaður "sérlegur aðstoðarmaður" sigursveitarinnar. Ekkert meira um það.

Af norðarsveitarmönnum fékk Rúnar Sigurpálsson (öðru nafni "Shaking Steven") flesta vinninga, eða 9 af 10. Bestur sunnanmanna var Mikael Jóhann Karlsson (öðru nafni "Mighty Mickey") með 4.5 vinning af 8. 

Svona var þessu nú misskipt.

Næsta mót verður svo á morgun nýjársdag og hefst kl. 14.00.

Andri og Rúnar jólasveinar SA 2022

Hið árlega jólahraðskákmót SA fór fram í gær, 29. desember. Í þetta sinn var mótið haldið í Lyst, hinu magnaða veitingahúsi í Lystigarðinum hér á Akureyri. Sautján keppendur mættu til leiks og tefldu níu umferðir. Að vanda var baráttan hörð og lauk þannig að tveir stigahæstu keppendurnir urður efstir og jafnir. Sannkallaðir erkijólasveinar. Efstu menn:

Andri Freyr Björgvinsson (Skyrsleikir)   7,5
Rúnar Sigurpálsson (Gluggasníkir)        7,5
Áskell Örn Kárason                       7
Sigurður Arnarson                        6
Allmargir fengu svo fimm vinninga,þeir Karl Egill Steingrímsson,  Jakob Þór Kristjánsson, Skafti Ingimarsson, Sigurður Eiríksson, Stefán G Jónsson, Mikael Jóhann Karlsson og Smári Ólafsson. 

Tveir gamilr félagar létu sjá sig og var vel fagnað. Auk þess mættu nokkrir til leiks sem ekki hafa sést á mótum félagsins áður.  Segja má að skákmótahald í Lystigarðinum sé komið til að vera!

 

 

Jólamótin - hraðskákmótið í Lyst!

Mótadagskrá Skákfélagsins um hátíðarnar er hefðbundin og fastmótuð. Svo verður einnig þessi jólin, en þó bryddað upp á nýjung.

Börnin fengu sitt jólamót um daginn, en nú er röðin komin að hinum fullorðnu. Jólahraðskákmótið verður nú haldið í Lystigarðinum í samvinnu við veitingastaðinn Lyst. Það hefst kl. 20 fimmtudaginn 29. desember. Veitingar á sérstöku tilboðsverði fyrir þátttakendur. Mótsgjald er kr. 1.500 og mun renna óskipt til björgunarsveitarinnar Súlna. Við vonumst auðvitað eftir góðri þátttöku enda þetta mót tilvalið fyrir iðkendur sem sjást ekki á hverjum degi í Skákheimilinu. 

Daginn eftir, þann 30. desember for svo hin árlega Hverfakeppni fram. Þar verður skipt í lið eftir búsetu og helst gert ráð fyrir því að þeir sem búa í bænum norðanverðum etji kappi við þá sem búa í suðurhlutanum. Ekki ólíklegt að mörkin verði dregin um Þingvallastræti, en endanleg niðurstaða um það fæst þegar keppendahópurinn liggur fyrir. Liðsstjóri Liga Nord verður Smári Ólafsson, en fyrir Suðurbandalagið Áskell Örn Kárason. Áhugasamir eru beðnir að hafa samband við annan þeirra og láta vita. 
Hér hefst taflið einnig kl. 20.

Að endingu getum við svo um Nýjársmótið sem kann að henta árrisulum skákiðkendum. Það hefst á nýjársdag kl. 14.