Alþjóðlegt skákmót á Akureyri

Hápunktur 100 ára afmælisárs Skákfélags Akureyrar er rétt handan við hornið. Um er að ræða alþjóðlegt skákmót sem ber heitið Icelandic Open 2019 - Akureyri Chessclub 100 Years. Mótið er einnig minningarmót um skákfrömuðinn Guðmund Arason sem allir skákunnendur á Íslandi þekkja.

Mótið hefst 25. maí og stendur til 1. júní. Lesa má nánar um fyrirkomulagið á heimasíðu mótsins: http://icelandicopenchess.com/ og sjá má skráða keppendur á síðunni: http://chess-results.com/tnr394928.aspx?lan=1

Þegar þetta er skráð er Ivan Sokolov, sem nú teflir fyrir Holland, stigahæsti þátttakandinn sem skráður er til leiks. Alls hafa 59 keppendur skráð sig og enn er opið fyrir skráningu. Tæpur tugur stórmeistara hefur boðað komu sína auk alþjóðlegra meistara og almennra skákáhugamanna. Erlendir keppendur sem skráðir eru til leiks eru vel á annan tug.

Teflt verður í menningarmiðstöðinni Hofi á Akureyri.

Símon sigurvegari BSO-mótsins

Þann 16. maí var BSO-mótið haldið. 11 keppendur voru mættir til leiks og sýndu snilldartilþrif á milli þess sem þeir gæddu sér á ljúffengum veitingum í boði BSO. Hart var tekist á, svo mikið að svokallaða armageddon skák(þar sem svörtum nægir jafntefli en hefur einni mínútu skemmri umhugsunartíma)þurfti til að skera úr um sigurvegara. Áskell Örn og Símon Þórhallsson tefldu þessa skák en báðir höfðu lokið keppni með 9 vinninga af 10 mögulegum. Símon stýrði svörtu mönnunum og hafði sigur og fyrsta sætið því hans.

Lokastaðan

1. Símon Þórhallsson 9

2. Áskell Örn Kárason 9

3. Andri Freyr Björgvinsson 8,5

4. Smári Ólafsson 6,5

5. Elsa María Kristínardóttir 6

6. Haki Jóhannesson 4,5

7. Gunnlaugur Þorgeirsson 4

8. Karl Egill Steingrímsson 3,5

9. Hjörtur Steinbergsson 3

10. Hilmir Vilhjálmsson 1

11. Kristinn Þórisson 0

BSO gaf verðlaun í mótinu fá bestu þakkir fyrir mótahaldið. 

 

BSO-mótið

Fimmtudaginn 16. Maí fer fram nýtt mót. Það kallast BSO-mótið, enda er það Bifreiðastöð Oddeyrar sem stendur að því með okkur. Mótið verður haldið í húsakynnum BSO að Óseyri 1a, en það hús kalla gárungarnir Taxeyri. Teflt verður um farandbikar sem Bifreiðastöð Oddeyrar gefur. Einnig verða verðlaunapeningar veittir fyrir 3 efstu sætin. Ekki nóg með þetta, heldur verða veitingar á boðstólum.
Herlegheitin hefjast kl. 20.00 og eru allir velkmonir.