Skákþing Akureyrar: Rúnar og Símon jafnir í efsta sæti!

Sjöunda og síðasta umferð er tefld í gær, 3. febrúar. Þar bar ýmislegt til tíðinda, þótt úrslit geti vart talist óvænt.

Símon-Arnar 1-0. Arnar Smári gaf skákina án taflmennsku.

Smári-Stefán 1-0. Stefán lék hinum ögrandi leik 1 - b6 í upphafi og uppskar jafna stöðu. Hann gætti sín þó ekki í miðtaflinu og mátti sætta sig við verra endatafl peði undir. Smára varð þá ekki skotaskuld úr því að aka vinningum heim til sín.

Sigurður-Benedikt 1-0 H+er gekk á ýmsu, en hvítur hélt þó ávallt góðum tökum á stöðunni og náði að afla sér peðs með öflugri máthótun. Við það varð Bensa fótaskortur og hann mátti gefa drottningu fyrir hrók og mann sem reyndist ófullnægjandi. Nokkuð öruggur sigur Ísfirðings gegn Hörgdælingi. 

Rúnar-Andri 1-0. Hér var meira undir en í öðrum skákum. Rúnar beitti s.k. drottningarvængsskáskoti (2. b3) gegn Sikileyjarvörn Andra og fékk alveg bærilega stöðu. Hún var samt viðkvæm og yfirfull af taktísku brellum. Eftir djarflegar fórnir hvíts fékk svartur skyndilega færi á því að tryggja sér jafntefli með þráskák. Hann vildi þó meira og missti af öflugum leik meistarans fráfarandi sem fól bæði í sér vörn og máthótun! Því varð ekki varist og svartur mátti gefast upp. Sjá:

Hér gat Andri leikið 23 - Rxa3+ og eftir 24. Ka2 Rc2+ verður þráskák ekki umflúin. Þess í stað reyndi svartur 23 - Rxd1? og yfirsást hinn firnasterki varnar- og sóknarleikur hvíts 23. Dd1! og svarta staðan er töpuð. 

 

Þeir Rúnar og Símon munu tefla einvígi um meistaratitilinn síðar í mánuðinum; fyrst tvær kappskákir og svo atskákir ef þörf er á.

 

 

Laugardagsmótin - tveimur mótum lokið

Laugardagsmótin hófust á ný eftir miðja janúar og nú er tveimur mótum lokið. Úrslit hafa orðið þessi:

	19.jan
röð	nafn	vinn
1	Ingólfur Árni Benediktsson	5
2	Markús Orri Óskarsson	4½
3	Jökull Máni Kárason	4
	Hulda Rún Kristinsdóttir	4
5	Sigþór Árni Sigurgeirsson	3½
6	Ingólfur Bjarki Steinþórsson	3
7	Júlía Sól Arnórsdóttir	2½
8	Arna Dögg Kristinsdóttir	2½
9	Ólafur Steinþór Ragnarsson	1
	2.feb
röð	nafn	vinn
1	Markús Orri Óskarsson	6
2	Arna Dögg Kristinsdóttir	4
3	Örn Marinó Árnason	4
4	Sigþór Árni Sigurgeirsson	4
5	Emil Andri Davíðsson	3
6	Hulda Rún Kristinsdóttir	2
7	Alexía Lív Hilmisdóttir	1

Næstu tvö mót verða haldin 16. og 23. febrúar og reiknast samanlagður árangur í þessum fjórum mótum til verðlauna.  Eftir tvö mót er Markús Orri efstur með 10,5 vinning. Sigþór Árni hefur 7,5;  Arna Dögg 6,5 og Hulda systir hennar 6 vinninga. Næsti slagur sumsé þann 16. febrúar, en fyrst er afmæliskaffið á sunnudaginn! 

Aldarafmæli Skákfélags Akureyrar

Eins og flestir lesendur þessarar síðu munu vita, er Skákfélag Akureyrar að verða 100 ára nú í febrúar.  Eitt og annað er á dagskrá í tilefni þessara tímamóta og er þetta helst:

Átak í skákkennslu fyrir börn á Akureyri. Frá haustinu 2018 hafa nálaægt 500 skólabörn á Akureyri fengið reglulega kennslu í heimaskólum sínum, aðallega átta og níu ára gömul börn. Um leið stendur félagið fyrir öflugri skákkennslu í Skákheimilinu með tímum á mánudögum í allan vetur, þar sem 20-30 börn á aldrinum sex til tólf ára stunda nám. Rgelurlega hafa verið ghaldin barnamót í allan vetur og verður svo áfram til vors. 

Barnamót á Skákdaginn 26. janúar.  Öðrum barnamótum til viðbótar var skákdagsins og aldarafmælisins minnst með móti í Brekkuskóla þann 26. janúar 2019. 

Afmælishátíð 9-10. febrúar 2019. Efnt verður til skemmtikvölds fyrir félaga og velunnara kl. 20 laugaradgainn 9. febrúar. Daginn eftir verður svo boðið til veislu í kaffiteríu Íþróttahallarinnar kl. 15.00. Þar verður hinna merku tímamóta minnst með veglegri dagskrá. 

Skákþing Norðlendinga, hið 85. í röðinni verður háð á Akureyri dagana 22-24. mars. Sérstaklega verpur vandað til mótsins í tilefni af aldarafmælinu. 

100 ára afmælisskákmót verður haldið í Hofi dagana 25. maí til 1. júní. Um er að ræða níu umferða opið alþjóðlegt skákmót sem jafnframt verður Íslandsmót (Icelandic Open) þar sem teflt verður um þrjá Íslandsmeistaratitla. Heildarverðlaun í mótinu nema 12.000 evrum. 

Íslandsmót öldunga 65 ára og eldri í Hofi dagana 26, maí til 1. júní. Tefldar verða sjö umferðir með kappskákfyrirkomulagi samhliða alþjóðlega mótinu sem að ofan greinir. +

Skákfélagið býður félaga sína, bæjarbúa og skákunnendur alla velkomna til þessarar afmælsidagskrár og vonast til að sem flestir sjái eitthvað við sitt hæfi meðal þeirra viðburða sem hér eru raktir.