Góður árangur í áskorendaflokki. Óskar Long mætir Gylfa á morgun

Áskorendaflokkur Íslandsmótsins í skák fer fram um páskana, 27. mars – 5. apríl. Tefldar verða níu umferðir eftir svissneska kerfinu. 39 keppendur eru skráðir til leiks og þremur umferðum af níu er nú lokið. Fjórða umferð fer fram á morgun, þriðjudag. Þá mætast meðal annars Óskar Long Einarsson og Gylfi Þórhallson.

Skákfélag Akureyrar á fjóra þátttakendur á mótinu og hafa þeir staðið sig vel. Hér verður sagt frá gengi þeirra hingað til og farið eftir styrkleikaröð.

Stigahæstur okkar manna er Gylfi Þórhallsson (2084) sem er í 9. sæti styrkleikalistans. Hann hefur teflt á pari við stigin sín, hefur hvorki grætt né tapað stigum og er í 9. sæti mótsins með 2 vinninga. Hann hefur unnið tvo stigalægir skákmenn og tapað fyrir einum stigahærri.

Næstur í röðinni er Stefán Bergsson (2063) sem er í 10. sæti styrkleikalistans. Hann sat yfir í fyrstu umferð en hefur unnið eina skák og tapað einni. Tapskák Stefáns var gegn stigalausum andstæðingi og kom nokkuð á óvart. Stefán mun klárlega ekki sætta sig við 50% árangur í mótinu. Hann er nú í 24. sæti og mun vinna sig upp í næstu skákum.

Andri Freyr Björgvinsson (1764) er í 24. sæti styrkleikalistans. Þeir sem þekkja kappann vita að hann er of stigalár miðað við getu. Það sést á árangri hans sem samsvarar nú 2299 skákstigum. Allir andstæðingar hans hafa verið með yfir 2000 skákstig en hann er samt með 1,5 vinninga og hefur aðeins tapað fyrir stórmeistaranum Hjörvari Grétarssyni. Andri er nú í 16. sæti og hefur grætt 46 stig á mótinu.

Fjórði keppandinn frá SA er Óskar Long (1574) sem er í 25. sæti styrkleikalistans. Óskar er með tvo vinninga í 3. umferð lagði hann FIDE-meistarann Dag Ragnarsson (2347) sannfærandi eins og sjá má í Fréttablaðinu í dag. Þetta er stigahæsti skákmaður sem Óskar hefur lagt af velli í kappskák hingað til. Árangur hans samsvara 2079 skákstigum og er hann með um 20 stig í plús fyrir frammistöðuna.

Samtals hafa félagsmenn SA grætt 75 stig á mótinu. Myndin er af Andra sem á rúman helming þessara stiga.