Íslandsmót skákfélaga 2010-2011 - Pistill formanns

Að venju voru þrjár síðustu umferðir mótsins tefldar fyrstu helgina í mars og var mótsstaðurinn Rimaskóli í Reykjavík, eins og verið hefur undanfarin ár.  Skákfélagið mætti til leiks í haust með fjórar sveitir, a-sveit í 1. deild, b- og c- sveitir í 3. deild og d-sveit í 4. deild. Var c-sveitin skipuð reynslumiklum mönnum sem a.m.k. hafa náð sextugsaldri og en d-sveitin yngissveinum að mestu, framtíðarmönnum félagsins. Fyrirfram mátti gera ráð fyrir að a-sveitin yrði í basli með að halda sér í hópi hinna bestu, enda tefldu margar sveitir í 1. deild fram öflugum stórmeisturum, allt niður á 5. og 6. borð. Þá stóðu vonir til þess að b-sveitin blandaði sér í toppbaráttu 3. deildar.

Keppendur héðan að norðan fóru suður á tveimur bílum upp úr hádeginu á föstudag 4. mars og komust klakklaust til höfuðborgarinnar, þótt aksturslag a.m.k. annars bílstjórans hafi þótt ámælisvert af sveitamönnum sem voru á suðurleið á sama tíma. Nokkrir höfðu svo komið sér suður á eigin vegum, en alls komu 19 keppendur að norðan á mótið, en sveitirnar voru styrktar af nokkrum félögum okkar sem búsettir eru á suðvesturhorninu.   Eins og undanfarin ár komu til liðs við okkur tveir félagsmenn danskrar ættar, þeir Thorbjörn Bromann og Jacob Carstensen og telfdu þeir á 1. og 2. borði í a-sveitinni og skiluðu hlutverki sínu með sóma. Þvert á ýmsar spár um hraklegt gengi a-sveitarinnar reyndist henni fremur auðvelt að halda sér uppi. Eftir að sigur vannst á TR-ingum í 5. umferð á föstudagskvöldið var bilið milli okkar og KR-inga og Hauka orðið of breitt til að brúa og raunar mátti ekki miklu muna að sveitin næði að hreppa 5. sætið.

Vonir b-sveitunga að komast upp um deild dofnuðu mjög við tap gegn feikisterkri sveit Goðans, (sem einvörðungu var skipuð skákmönnum af suðvesturhorninu) og urðu að engu þegar næsta viðureign tapaðist líka.  Öldungasveitin var með falldrauginn á hælunum, en mikilvægur sigur í næstsíðustu umferð nægði þeim til að sleppa við fall og er ekki að efa að þeir lávarðarnir mæta tvíelfdir til leiks næsta haust. Bestur árangri okkar manna í umferðunum þremur náðu hinsvegar ungu mennirnir í d-sveitinni, sem höfðu betur í öllum þremur viðureignum sínum og hífðu sig uppfyrir miðja deild. Þeir Jón Kristinn Þorgeirsson, Hjörtur Snær Jónsson og Logi Rúnar Jónsson, allt liðsmenn í d-sveit, náðu bestum árangri félagsmanna í þetta sinn, fengu 2,5 vinning í skákunum þremur. Þá spreytti einn nýliði sig með félaginu, Friðrik Jóhann Baldvinsson, sem kom inn á 6. borð í d-sveitinni og vann þar sinn fyrsta sigur í kappskák á ævinni.  Við hljótum því að mega vænta mikils af þessum ungu mönnum á næstu árum.

Að samanlögðu má segja að árangur Skákfélagsins hafi verið að vonum í þetta sinn og hlýtur stefnan á næsta ári að vera sett á að eiga áfram sveit í deild hinna bestu og að reyna að koma b-sveitinni upp um deild. Þá er unglingasveitin til alls vís með sama áframhaldi.

Lokastöðuna í mótinu má nálgast hér