Landsmót í skólaskák: Tvímennt á toppnum í báðum flokkum.

Landsmótið í skólaskák hófst á Akureyri í dag og ru fjórum umferðum nú lokið. Í eldri flokki hafa tveir stigahæstu keppendurnir, Vignir Vatnar Stefánsson og Hilmir Freyr Heimisson, tekið forystuna, með 3,5 vinning. Þeir sömdu stutt jafntefli í innbyrðis skák þar sem hvorugur vildi láta sverfa til stáls.  Þeir félagar hafa náð vinningsforskoti á næstu keppendur, sem eru Nansý Davíðsdóttir, Birkir Ísak Jóhannsson og Stephan Briem.  Nansý hefur átt erfitt uppdráttar það sem af er. Hún á eftir að mæta báðum forystusauðunum og teflir við Hilmi í fimmtu umferð í fyrramálið.

Í yngri flokki gerðu þeir Róbert Luu og Benedikt Briem jafntefli í skák sinni í fjórðu umferð og deila nú efsta sætinu með 3,5 vinning hvor. Þeirra skák var hinsvegar tefld í botn.  Gunnar Erik Guðmundsson er þriðji með 3 vinninga og teflir við Benedikt í fyrramálið.

Fulltrúar okkar heimamanna hafa átt erfitt uppdráttar þar sem af er, einkum í yngri flokki. Arnar Smári er með tvo vinninga af fjórum í eldri flokki og má nokkuð vel við una; Gabríel hefur sömuleiðis tvo í yngri flokki; þeir Ágúst Ívar og Fannar hafa einn vinning hvor.

Eins og komið hefur fram fer mótið fram í Rósenborg – hinu gamla húsi Barnaskóla Akureyrar við Skólastíg.  Teflt er í Félagsmiðstöðinni Tróju, auk þess sem meirihluti keppenda gistir í húsinu.

Á morgun, laugardag verða tefldar tvær umferðir með keppskákarfyrirkomulagi og hefst fyrri umferðin kl. 10.

Öll úrslit á chess-results: yngri og eldri